Быйыл киэн туттар биир дойдулаахпыт, биллиилээх, убаастанар уһулуччулаах государственнай уонна политическай деятель Илья Егорович Винокуров төрөөбүтэ 130 сылын бэлиэтиибит. Илья Винокуров Саха сиригэр норуот хаһаайыстыбата, о.э доруобуйа харыстабыла, тутуу, суол, үөрэхтээһин, культура, тыа хаһаайыстыбата, промышленность эйгэлэрэ сайдыыларыгар уонна дьон – норуот туһугар үтүөтүн – өҥөтүн сыаналаан, убаастаан республика таһымыгар, СӨ Бырабыыталыстыбатын уонна Ил Дарханын дьаһалтатын салайааччыта Георгий Михайлов бэрэссэдээтэллээх, үбүлүөйдээх тэрээһиннэри, үлэни ыытар уонна тэрийэр хамыыһыйа тэриллэн үлэтин саҕалаабыта.
Тохсунньу 14 күнүгэр, улуус баһылыга Юрий Слепцов сарсыарда эрдэттэн бу боппуруоска Дьокуускайга үлэлээтэ. Ол курдук, СӨ тыатын хаһаайыстыбатын уонна ас-үөл бэлиитикэтин миниистирэ Артем Александрову, СӨ үөрэх уонна билим миниистирэ Нюргуна Соколованы, СӨ кылаабынай архитектора Любовь Папок, СӨ транспорт уонна суол-иис хаһаайыстыбатын миниистирин солбуйааччы Семен Коркины, СӨ физическэй культураҕа уонна спорка миниистирин солбуйааччы Гаврил Мохначевскайы, СӨ доруобуйа харыстабылын миниистирэ Лена Афанасьеваны кытта көрсөн, атах тэпсэн олорон кэпсэттилэр, үбүлүөйдээх сылга былаан быһыытынан ыытыллар үлэлэр, тэрээһиннэр боппуруостарын быһаарыстылар, торумнаатылар. Ол курдук, тулалыыр эйгэни тупсаран оҥоруу, суол – иис, тутуу үлэлэрэ, өрөмүөннэрэ, тыа хаһаайыстыбатын салаатын салгыы сайыннарыы, Илья Егорович Винокуров үтүө аатын, норуотун туһугар туруулаһан үлэлээбит үлэтин, дьоһун олоҕун үйэтитии, сырдатыы үлэни салгыы ыытыы туһунан боппуруостары кэпсэттилэр. Илья Егорович Винокуров салайааччы быһыытынан үлэлээбит улуустарыгар, былаан быһыытынан, тэрээһиннэр ыытыллыахтара.
Бүгүҥҥү көрсүһүүлэргэ министиэристибэлэр тустаах исписиэлиистэрэ, Хатыҥ – Арыы нэһилиэгин баһылыга Иван Ноговицын, улуустааҕы үөрэх управлениетын начальнига Мария Игнатьева, Нам улууһун кылаабынай бырааһа Ариан Сергеев, спорт уонна физическэй культура управлениетын начальнига Павел Иванов, улуус баһылыгын көмөлөһөөччүтэ Наталья Поскачина, тыа хаһаайыстыбатын управлениетын начальнига Владимир Макаров кыттыыны ыллылар.
“Нам улууһа” МО пресс – сулууспата
