Бүгүн, тохсунньу 19 күнүгэр, «Нам улууһа» МО баһылыгын планерка мунньаҕар улуус баһылыгын солбуйааччылара, улуус тэрилтэлэрин уонна дьаһалта отделларын, управлениеларын салайааччылара кыттыыны ыллылар. Мунньаҕы улуус баһылыгын эбээһиннэһин толорооччу Анатолий Павлов салайан ыытта.

Мунньах сүрүн тиэмэтэ тохсунньу 16 күнүгэр икки этээстээх чааһынай дьиэ умайбытын туһунан буолла.

Намнааҕы ОГПС салайааччыта Иван Винокуров буолбут быһылаан туһунан сиһилии сырдатта, бэйэтин этиилэрин киллэрдэ. Хомойуох иһин, баһаар түмүгүнэн уокка үс оҕо былдьанна. Уот турбут биричиинэтин следственнай-оперативнай бөлөх чуолкайын өссө быһаара сылдьар. Нэһилиэнньэ баһаары сэрэтэр АДПИ туруоралларын туһугар үлэбитин өссө күүһүрдүөххэ диэн этии киллэрдэ. Маны таһынан “икки этээстээх дьиэлээх дьон баһаарнай лестница туруораллара эбитэ буоллар” – диэн баҕа санаатын эттэ.

Үөрэх управлениятын салайааччыта Мария Игнатьева иһитиннэрбитинэн, уокка былдьаммыт оҕолор бииргэ үөрэммиттэрин кытта бу ааспыт субуотаҕа психологическэй көмө үлэлэрэ ыытыллыбыттар.

Роспотребнадзор иһитиннэриитинэн, оҕолор истэригэр кишечнай инфекция быһаарыллыбыта 4 случай, коронавирус – 2, пневмония – 3.

Мунньах түмүгэр, Анатолий Павлов баһаары сэрэтэр уонна психологическэй көмө үлэлэрэ күүстээхтик ыытыллыахтаахтарын бигэргэтэн эттэ.

“Нам улууһа” МО пресс-сулууспата