Тохсунньу 26 күнүгэр, бэнидиэнньиктээҕи планерка мунньаҕы улуус баһылыгын э.т. Анатолий Павлов салайан ыытта.
Роспотребнадзор Намнааҕы салаатын кылаабынай специалист – эксперэ Варвара Оконешникова иһитиннэрбитинэн, ааспыт нэдиэлэҕэ улууска коронавирус дьаҥынан 14 сааһын туола илик 4 оҕо ыалдьыбыта бэлиэтэммит. Салгын уоспатынан (ветряная оспа) – 1 оҕо, сэбиргэхтэтэн ыалдьыы (внебольничная пневмония) – 2 улахан киһи, ис ыарыытынан (острая кишечная инфекция) – 3 киһи, ол иһигэр 1 оҕо ыалдьыбыттар.
Киин балыыһа кылаабынай бырааһа Ариан Сергеев, өрөспүүбүлүкэтээҕи мобильнай биригээдэ быраастара улуус олохтоохторугар үрдүк таһымнаах медицинскэй көмөнү оҥорон барбыттарын кэпсээтэ. Ол иһигэр 56 эпэрээссийэ ыытыллыбыт.
Сарсын, тохсунньу 27 күнүгэр, 11 быраастан турар биригээдэ Салбаҥҥа оҕолору уонна улахан дьону көрүөхтэрэ. Онтон тохсунньу 29 күнүгэр 2-с Хомустаахха улахан дьону көрүөхтэрэ.
Быйылгы үөрэх дьылын аҥаара номнуо түмүктэнэн, үөрэнээччилэр үһүс чиэппэргэ үөрэнэ сылдьаллар. Улуустааҕы үөрэх упралениетын начальнига Мария Игнатьева бэлиэтээбитинэн, 9-с уонна 11-с кылааһы бүтэрээччилэргэ ордук эппиэттээх кэмнэр саҕаланнылар. Ол курдук, оҕолор быйыл сүрүн (ОГЭ) уонна биир кэлим государственнай экзамены (ЕГЭ) туттарарга бэлэмнэнэ сылдьаллар. Бу нэдиэлэ – булгуччулаах экзаменнар таһынан, баҕа санааларынан бэйэлэрэ талан туттарар эбии предметтэрин быһаарынар бүтэһик нэдиэлэлэрэ буолар. Онтон 9-с кылаастар кулун тутар 1 күнүгэр диэри быһаарыналларыгар бириэмэ баар.
Ааспыт нэдиэлэҕэ баһаартан сэрэхтээх буолуу, эппиэтинэһи үрдэтии боппуруоһугар сырдатыы – өйдөтүү үлэ ыытылынна. Ол курдук, улуус бары оскуолаларын коллективтарын, үөрэнээччилэр төрөппүттэрин, сокуоннай иитээччилэрин кытта ВКС нөҥүө улахан мунньах ыытылынна. Мунньахха баһаарынай надзор дознавателэ уонна сэрэтэр үлэтин специалиһа Ян Ядреев кыттыыны ылла, иһитиннэриилэри оҥордо.
Төрөппүт оҕотун иитиигэ – үөрэтиигэ сүрүн кыттыылааҕын таһынан, оҕо доруобуйатыгар уонна олоҕор куттал суоһаабатын туһугар улахан эппиэтинэһи сүгэрин умнуо суохтаах.
Олунньу 6 күнүгэр улуустааҕы нуучча тылын уонна литературатын учууталларыгар форум ыытыллыаҕа.
Үгэскэ кубулуйбут кэрдиис кэмнэри түмүктүүр, саҥа ньымалары үллэстэр уонна үөрэх үлэһиттэрин кыһалҕаларын дьүүллэһэр олунньутааҕы учууталлар мунньахтара (улуус педагогтарын сүбэ мунньаҕа ) олунньу 14 күнүгэр ыытыллыаҕа.
Кыстык ортолоото. Улуустааҕы тыа хаһаайыстыбатын управлениетын начальнига Владимир Макаров иһитиннэрбитинэн, тохсунньу 23 күнүн туругунан улуус үрдүнэн 120 ынах, 1 биэ төрөөбүт.
Хортуопуй сиэмэтигэр сайаапкалары хомуйуу саҕаламмыт.
Намнааҕы социальнай харалта управление салайааччытын солбуйааччы Наталья Шадрина, бу сылтан социальнай контракт түһэрсэн көмө ылыы балаһыанньатыгар уларыйыылар киириэхтэрэ диэн иһитиннэрдэ. Бу күн туругунан, гаас ситимин дьиэҕэ диэри босхо тардыы программа тосхолунан, төһө суумалаах субсидия (көмө) уонна социальнай контракка төһө квота улууска көрүллэрэ чуолкайданар диэтэ.
Улуустааҕы культура уонна духуобунай сайдыы управлениетын салайааччыта Семен Ядрихинскай иһитиннэрбитинэн, М.К.Аммосов аатынан культура уонна духуобунай сайдыы дыбарыаһыгар 2026 сылга ыытыллар тэрээһиннэр сыллааҕы былааннанара график быһыытынан ыйынан, күнүнэн чопчуланан туолбут.
Намнааҕы Ис дьыала отделын начальнигын солбуйааччы Михаил Сосин иһитиннэрбитинэн, ааспыт нэдиэлэҕэ ГИБДД линиятынан 110 административнай протокол толоруллубут. 1 – уоруу, 1 – сураҕа суох сүтүү, 1 – сокуоннайа суох арыгыны атыылааһын, 1 – бэйэҕэ тиийинии, 1 – өлүгү булуу, 1- түөкүннээһин, 4 –киһини эчэтии түбэлтэлэрэ тахсыбыт.
“Нам улууһа” МО сирин, баайын – дуолун салайар комитет (КУМИ) директора Святослав Белолюбскай, билигин социальнай ситимнэргэ “Дальневосточнай гектарынан сир ыларгытыгар көмөлөһөн өҥө оҥоробут” диэн харчыга өҥө оҥоруу туһунан ис хоһоонноох биллэриилэр элбээбиттэрин эттэ. Дьиҥэ олохтоохтор дальневосточнай гектары госуслуга нөҥүө киирэн талан босхо ылыахтарын сөп, ону толору сатаан туһаммакка олороллор диэтэ. Улуус олохтоохторугар «Сири дальневосточнай гектар программанан ылыы” туһунан үөрэтэр семинары ыытары былаанныыбыт диэн иһитиннэрдэ.
Намнааҕы 23 №-дээх баhаарынай этэрээт начальнига Иван Винокуров баһаары утары өйдөтөр – сырдатар үлэлэр салгыы ыытыллалларын иһитиннэрдэ. Дьиэҕэ баһаартан сэрэхтээх буоларга уонна суһал көмөнү оҥорорго баһаарынай тэрил (извещатель ‒ АДПИ), огнетушитель хас биирдии дьиэҕэ баар буолуутун ситиһиини нэһилиэк дьаһалталара, общественность, тэрилтэлэр салайааччылара хонтуруолга ылалларыгар, профилактическай үлэни күүһүрдэллэригэр эттэ. АДПИ-ны туруоруу үлэтэ улуус, нэһилиэктэр дьаһалталарын, тэрилтэлэр салалталарын болҕомтолоругар күүскэ турар.
“Нам улууһа” МО пресс – сулууспата
