Олунньу 16 күнүгэр, бэнидиэнньиктээҕи планерка мунньаҕы улуус баһылыгын э.т. Анатолий Павлов салайан ыытта.

• Нам улууһун киин балыыһатын кылаабынай бырааһа Ариан Сергеев иһитиннэрбитинэн, ааспыт нэдиэлэҕэ сотору кэминэн үлэҕэ киирэр саҥа эмтиир куорпус дьиэтигэр субуотунньуктар ыытыллыбыттар. Субуотунньукка улуустааҕы үөрэх салаатын, Ис дьыала отделын (ОМВД) уонна социальнай харалта управлениетын үлэһиттэрэ көхтөөх кыттыыны ылбыттар. Саҥа куорпус арыллыытыгар бэлэмнэнии үлэлэрэ салгыы ыытыллаллар диэтэ.
• Намнааҕы баһаарынай этэрээт начальнига Иван Винокуров иһитиннэрбитинэн, ааспыт нэдиэлэҕэ Лиэнскэй нэһилиэккэ чааһынай дьиэҕэ баһаар турбута бэлиэтэммит. Туора дьон уоту эрдэ көрөн биллэрбиттэрин түмүгэр, олорор дьиэни баһаартан быыһаабыттар.
• Нэһилиэктэр дьаһалталара, 2026 сыллааҕы баһаары утары сэрэтэр — өйдөтөр үлэлэрин былаанын тиэрдэ иликтэрин туһунан иһитиннэрэ.
• Өрөспүүбүлүкэ үрдүнэн техногеннай балаһыанньаттан сылтаан баһаар тахсыытын сэрэтэр сыаллаах «Гараж» уонна «Жилище» профилактикалыыр операциялар салҕаналлар. Бу тэрээһиннэр чэрчилэринэн, нэһилиэнньэ ортотугар куттал суох буолуутун тутуһар туһунан өйдөтөр -сырдатар үлэ утумнаахтык ыытыллар. Ол курдук, ааспыт нэдиэлэ түмүгүнэн уопсайа 81 ыалга сылдьан, баһаартан сэрэхтээх буолуу быраабылаларын билиһиннэрдилэр уонна анал инструктаж ыыттылар.
• «Намкоммунтеплоэнерго” АО салайааччыта Николай Игнатьев, өрүс уҥуор сытар нэһилиэктэргэ чоҕу таһыы үлэтэ кыралаан саҕаланна диэн иһитиннэрдэ.
• Тыа хаһаайыстыбатын управлениетын салайааччыта Владимир Макаров иһитиннэрбитинэн, улуус үрдүнэн 405 ынах төрөөбүт, ол эбэтэр бу улуус үрдүнэн ынах уопсай ахсааныттан 11% — на буолар.
• Улуус хаһаайыстыбаларын сүөһүлэрэ — сылгылара кыстыгы этэҥҥэ туоруулларыгар от саппааһа тиийэр диэтэ.
• Тыа хаһаайыстыбатын сайыннарыыга туһуламмыт араас таһымнаах граннар уонна субсидиялар күрэхтэрин (куонкурустарын) биллэрии саҕаламмыт.
• Нам улууһун үөрэҕин салалтатын салайааччыта Мария Игнатьева ааспыт субуотаҕа ыытыллыбыт олунньутааҕы сүбэ мунньах түмүгүн иһитиннэрдэ.
• Бу тэрээһиҥҥэ Намтан төрүттээх учуонайдар уонна Дьокуускай куоракка үөрэх эйгэтигэр үлэлии сылдьар биир дойдулаахтарбыт кыттыыны ыллылар.
• Мунньах биир сүрүн сыалынан учуонайдар научнай билиилэрин уонна баай уопуттарын улуус үөрэҕин систиэмэтин сайдыытыгар туһаныы буолар диэтэ.
• Ону таһынан Мария Семёновна Нам улууһуттан төрүттээх, наука араас эйгэтигэр үлэлиир учуонайдары түмэр сыаллаах ассоциацияны улуус таһымыгар тэрийэргэ этии киллэрдэ.
• Павел Иванов, физическэй культура уонна спорт управлениетын начальнига, ааспыт өрөбүллэргэ икки күн устата ыытыллыбыт «А» категориялаах «Эҥсиэли хапсаҕайа» өрөспүүбүлүкэтээҕи турнир түмүктэрин сырдатта. Павел Гаврильевич күрэхтэһиини ыытыыга күүс-көмө, өйөбүл буолбут тэрилтэлэргэ, нэһилиэктэргэ уонна урбаанньыттарга махталын биллэрдэ.
• Ону тэҥэ, эһиил — 2027 сылга — турнир 10 сыллаах үбүлүөйүн үрдүк таһымнаахтык тэрийэр туһугар бэлэмнэнии үлэ эрдэттэн ыытыллыаҕа диэтэ.
• Кулун тутар 12 күнүгэр анал байыаннай дьайыы кыттыылаахтарыгар — биир дойдулаахтарбытыгар көмөлөһөр сыаллаах аһымал акция ыытыллара былааннанар. Быйылгы тэрээһин уратыта диэн — тэрээһин нэһилиэктэринэн ыытыллыаҕа.
• Бу сылтан Нам улууһун дьаһалтатын наҕараадалыыр бэрээдэгэр уларыйыылар киириэхтэрэ. Маны таһынан, уһулуччулаах биир дойдулаахтарбыт М.К. Аммосов уонна И.Е. Винокуров ааттарынан улуус сайдыытыгар тус кылааттарын, ситиһиилэрин иһин биэстии анал наҕараада туттарыллар буолара былааннанар.
• Култуура уонна духуобунай сайдыы управлениетын салайааччыта Семен Ядрихинскай «Тэрилтэнэн култуурунай тахсыы» проект кубогын Нам улууһун баһылыгын э.т. Анатолий Павловка туттарда.
• Семен Прокопьевич култуура эйгэтигэр үлэ былаан быһыытынан бара турарын иһитиннэрдэ.
• Үбүлүөйдээх тэрээһиннэр чэрчилэринэн, Саха сиригэр оҕо кинигэтин иллюстрациятын төрүттээччилэртэн биирдэстэрэ, биллиилээх худуоһунньук-график, киэн туттар биир дойдулаахпыт Ефим Михайлович Шапошников төрөөбүтэ 100 сылын бэлиэтиир тэрээһиннэр былааннара оҥоһулларын уонна бу боппуруоска ситимнээх кэпсэтиилэр ыытыллалларын туһунан иһитиннэрдэ.
• Олунньу 17–18 күннэригэр Нам улууһун баһылыга Юрий Слепцов анал дьаһалынан, улууска Россия наукатын академиятын Сибиирдээҕи салаатын Гуманитарнай чинчийии уонна хотугу аҕыйах ахсааннаах омуктар кыһалҕаларын института киэҥ программалаах күннэрэ ыытыллыахтара. Тэрээһиҥҥэ биллиилээх учуонайдар, профессордар уонна билим үлэһиттэрэ кыттыыны ылыахтара. https://t.me/namskiyulus/69406
• Семен Прокопьевич наука үлэһиттэрэ улуус олохтоохторун, кыраайы үөрэтээччилэри уонна эдэр ыччаты кытта көрсүөхтэрэ, актуальнай боппуруостары дьүүллэһиэхтэрэ, бэйэлэрин чинчийиилэрин уонна үлэлэрин  билиһиннэриэхтэрэ диэн иһитиннэрдэ.
• Ону таһынан тэрилтэ салайааччыларын, үлэһиттэрин уонна улуус олохтоохторун тэрээһиҥҥэ кэлэн көхтөөх кыттыыны ылалларыгар ыҥырда. 
• Улуус баһылыгын солбуйааччы Юрий Дьяконов олунньу 20 күнүгэр Аҕа дойдуну көмүскээччилэр күннэригэр аналлаах «Сердце — Родине, Слава — Героям!» диэн тэрээһиннэр программаларын билиһиннэрдэ.
• Тэрээһин сарсыарда Кыайыы уонна Бойобуой дьайыылар бэтэрээннэрин сквердэригэр тыыннаах сибэккилэри ууруунан саҕаланыаҕа.
• Салгыы М.К. Аммосов аатынан болуоссакка «Эҥсиэли эр хоһууттара» диэн эр дьоҥҥо аналлаах алгыс сиэрэ-туома ыытыллыаҕа уонна оһуохай тэриллиэҕэ.
• М.К. Аммосов аатынан культура уонна духуобунай сайдыы дыбарыаһыгар Аҕа дойдуну көмүскээччилэр күннэригэр аналлаах тэрээһиннэр уонна бырааһынньыктааҕы кэнсиэр ыытыллыахтара.
• Нам улууһун баһылыгын солбуйааччы Егор Протопопов сокуоннай саастарын туола илик оҕолор дьыалаларын уонна кинилэр бырааптарын көмүскүүр комиссия мунньаҕын түмүгүн билиһиннэрдэ.
• Ааспыт сылга оҕо буруйу оҥоруута элбээбитин бэлиэтээтэ уонна бу боппуруоһу ураты болҕомтоҕо ылан, ситимнээх үлэни күүһүрдэр наадалааҕын эттэ. 

«Нам улууһа» МО пресс-сулууспата