Кулун тутар 2 күнүгэр, бэнидиэнньиктээҕи планерка мунньаҕын улуус баһылыга Юрий Слепцов ыытта.
Намнааҕы киин балыыһа кылаабынай бырааһа Ариан Сергеев иһитиннэрбитинэн:
- ааспыт нэдиэлэҕэ стационарга 37 киһини эмтээбиттэр, ол иһигэр – 16 оҕо;
- 125 киһи суһал көмөҕө наадыйбыт, ол иһигэр — 39 оҕо.
- Билиҥҥи туругунан улуус үрдүнэн диспансеризация былаана 18% туолбут.
- Ааспыт бээтиниссэҕэ, олунньу 27 күнүгэр, ыытыллыбыт «Норуот доруобуйата – хас биирдиибит эппиэтинэһэ» (Здоровье нации – ответственность каждого) диэн форумҥа 1тыһ. тахса киһи кыттыыны ылбыт. Аахсыйанан доруобуйаларын көрдөрүммүттэр.
- Стоматолог быраастар Арбын нэһилиэгэр тахсан нэдиэлэ устата 40 олохтооҕу эмтээбиттэр.
- Кулун тутар 3 күнүгэр исписэлиистэр (кардиолог, невролог, лор, хирург, гинеколог, офтальмолог, эндокринолог о.д.а.) Фрунзеҕа уонна кулун тутар 5 күнүгэр Көбөкөҥҥө тахсан үлэлиэхтэрэ.
«Намкоммунтеплоэнерго» АО салайааччыта Николай Игнатьев иһитиннэрбитинэн, өрүс нөҥүө сытар нэһилиэктэргэ чох тиэйиитигэр билиҥҥи туругунан уопсайа 20 тыһ. туоннаттан 5 тыһ. таһаарбыттар. Кулун тутар 15 күнүгэр диэри барытын таһан бүтэрэллэрэ күүтүллэр.
Дьиэ кэргэн уонна ыччат бэлиитикэтин управлениетын кылаабынай исписэлииһэ Инга Захарова сарсын «Нам улууһун общественнай тэрилтэлэрин 2025 с. үлэтин түмүгэ» тэрээһин буоларын туһунан санатта.
Улуустааҕы успуорт уонна физическэй култуура салалтатын салайааччыта Павел Иванов иһитиннэрбитинэн ааспыт нэдиэлэҕэ Ленскэй нэһилиэккэ ыытыллыбыт футболга уонна баскетболга сүүмэрдиир күрэх түмүгүнэн хамаандалар путевка ылары ситиспиттэр. Бу нэдиэлэҕэ волейболга уолаттар хамаандалара Тааттаҕа путевка былдьаһа бараллара былааннанар, ый бүтүүтэ – кыргыттар күөн көрсүһүөхтэрэ.
Үөрэх управлениятын салайааччыта Мария Игнатьева иһитиннэрбитинэн, ≪Эдэр профессионаллар≫ (≪Молодые профессионалы≫) диэн күрэхтээһии түмүгүнэн Нам улууһа өрөспүүбүлүкэ үрдүнэн 5 бастыҥнар иһигэр киирбит. Маны таһынан, Искра нэһилиэгин оскуолатын боппуруоһугар кулун тутар 15 күнүгэр диэри быһаарыахха диэн этии киллэрдэ.
Улуус баһылыга Юрий Слепцов тас биричиинэттэн өлүүнү намтатыыга уонна демографияны тупсарыыга хас биирдии дьаһалта салааларыттан үлэ былаанын ирдээтэ. Кулун тутар 20 күнүгэр диэри анал хамыыһыйа мунньаҕар этиилэрин, былааннарын киллэрэллэригэр сорудахтаата. Маны таһынан Бырабыытылыстыба отчуотун түмүгүнэн хас биирдиилэригэр эмиэ кэккэ сорудахтары анаата. Киирбит ыйытыылар, этиилэр боротокуолга тиһиллэн, ону быһаарыыга уонна толорууга үлэ былаан быһыытынан ыытыллар.
«Нам улууһа» МО Пресс-сулууспата
